SHIRE SANGY
دوشنبه, ۸ شهریور ۱۳۹۵، ۰۲:۰۵ ق.ظ
شاهکاری دیگر در شعر و ادبیاتِ بختیاری :
در فرهنگ و آداب و رسومِ ایلِ بختیاری ، شیرِ سنگی نِمادی از
شهامت و دلیریست که بختیاریها بر رویِ آرامگاه مردانِ بزرگِ
و دلیرِ ایل میگذارند.
شیرِ سنگی
ای گُلِ مَی نا سُهری که از تو دیرُم!
عُمریه که مو وِه عشقِ تو اسیرُم
دودَرِ چالنگی که وِه سردِسیری!
مو کُرِ هَف لَنگِ مِلکِ مالِمیرُم
دِی بیو مِنِه دِلُم ، کم ناز بِکُن سیم
ایدونی اَر تَیم نیای تا صُحو ایمیرُم ؟
وا کَدِت هر شَو ایای وِه مِن خیالُم
غمِ دیریت وِه خدا دِی کرِدهِ پیرُم
دُنگُلِی که تیه کالِ ایل و مالی !
دلُم عاشق اوویده وا با تو گیرُم
وِم گُهدی اَمسال مو وا بهار اِیاهُم
قولی که وِه مو دادی نیره زِه ویروم
بِنیَهر وِه رنگ و ریم ،چه حالی دارُم
مو زِه داغِ عشقِ تو اینی ایمیرُم
اَر مُردُم زیتر بیو وِه سَرِ لاشُم
بِنه رِی خاکِ مَزارُم سنگِ شیرُم .
شهریورماه ۱۳۹۵--- داوود جمشیدیان،مُتِخَلِص به سِتین
