مانکَن یا حور
کَمون و تاوِه بُرگات ، تَش ایوَنِه وِه جونُم
یِه دَم اووَر کِشونُم ، یِه دَم ایوَر کِشونُم
نَونُم عروسکی تو ، یا که حورِ بهشتی
وِه او خدا ، وِه دینت ، یونِه هرگز ندونُم
هرفَی ریتِه ایبینُم ، وِه عشقِت وَرهِلاسُم
هَی خوام بُنگِت کُنُم مو، بَند ایبووه زَوونُم
لَووام که نوم رِی لَووات ، گُرایگِرِن دوتا لَوم
دل و دَسُم ایلَرزِه ، تیات ایدِن تَکونُم
پَلات که یان دِیاری ، غَش ایکُنُم ایوفتُم
چی تیر وِه دلِ پازَن ، تیات گِرِن نشونُم
دلِم هَی تَنگ ایبو سیت ، تو سِتینه دِلُمی
ایخوام بیام وِه دینِت ، اَی عشقِ مهرَوونُم
یِه تار زِه او میاته ، نیدوم و جا یه دنیا
همه دارو نَدارُم ، غیرا پَن تیر پَرونُم.
مهرماه ۱۳۹۵ --- داوود جمشیدیان ( سِتین )
